Lu ‘ndore forte de la salamastra,
vecchi pariti ‘nsarduti de lu mare,
uci spardute, rumuri de vagnuni.
A ddai ‘nu giurnu jeu àggiu tturnare.
Ma chianu chianu ‘a vita te bbanduna,
‘rriva lu ‘mbiernu, tuttu ete siccatu,
ddu scoju, ddu mare staci visciu
cmu ‘ntra ‘nu snnu ricamatu.
Nui simu comu cocce ‘ntra lu mare
E comu rena ca ffunda ‘ntra lu fangu,
nu ttimu ‘a morte ca me pjia ‘mprima.
Luntanu de ddai: quistu sta’ chiangu.
‘Nturnisciata de fiuri e gersumini,
perne piràscene, tuttu ‘ncantu e risu,
china de steddhe e luci brillantate
‘u postu cchiù beddhu de lu Paratisu.
Cara vecchia curte Sant’Antoni,
jeu te racordu beddha puru la sera,
a n’angulu hai scusu ‘u core meu
e cmu passu te ‘mbuti a primavera.
Ma quante primavere su’ passate,
ogne ttantu ritornu, t’àggiu bbitire,
scurnusu, de notte e ccu lla luna
e chiangu, chiangu làcrame de sire.
