Arte della Pesca

arte_della_pesca
I pescatori curano con zelo la tessitura e il rammendo delle proprie reti. Per loro è un momento tanto importante quanto festoso; una delle operazione più importanti è la cosiddetta tinta, cioè la tintura delle reti, che si effettuava nei caseggiati sul molo di Giudecca, o in un fabbrico, detto “casa della tinta”, sul molo dove ora c’è il Circolo della vela.

{tab=Tipi di Pesca}

Calamari cu la spineddha   –   Canna*   –   Casciuli te notte   –   Chiangi*   –   Conzu*   –   Curiscia cu la lenza –   Fiacca   –   Lenza*   –   Mazza e focu   –   Nassa*   –   ‘Ngegnu   –   Pisca intra li buchi   –   Purpara*   –   Rusacchiu   –   Strascicu*   –   Scire a Corzie   –   Surta e Cernia   –   Togna   –   Tracìna   –   Tramacchiati*   –   Tratta*


Calamari cu la spineddha

‘Nzignene li friddi, vene lu tiempu te le pittule e tante ote nu sai comu òi cu le ‘ssaggi, e allora… pijati n’opa e ‘nfilatala su na spineddha, ca ete nu fierru cu l’ami sotta ca parene tante spingule girate. Ci stamu allu mese te novembre o dicembre quandu pe’ lu friddu te cate lu nasu intra l’acqua ole cu dica ca stà pischi a calamari cu la spineddha. Calamaru, pesce “signore”.


Casciuli te notte

Quandu suntu le nove te sera, lu ‘Ntunucciu se ‘ggiusta tuttu e, prima cu essa, se ‘ggira e tice: “Maria, jeu sta me nde vau”; “Vanne, vanne…”, raspunde mujerasa. Ete luju, nu tiempu beddhu calmu ca nu se move na paja e la Maria stae scusciatata ca tantu sape ca maritusa sta bae, comu sempre, cu pisca a casciuli. Cu la varca ‘rriva allu “core te lu malone”, susu nu schiaccu te rena ca canusce bonu. Cala toi ancure a ‘llongu, una te prua e una te puppa, cusì la varca stae ‘nchiuvata a ‘mmienzu; poi ‘nzigna cu mena francate te alaca e malote, ca pe’ li casciuli suntu comu la pasta cu le purpette. Cala na lenza fina fina ca nu se vite mancu cu li ‘nchiali, cu ‘ddoi amure piccicche ca tenene pe’ cuta na malota. Quista ete na pisca ca s’ave fare senza rusciu né luce e lu ‘Ntunucciu le sape ‘bbone tutte ste cose. Passene le ore piscandu. Quandu torna a casa prima cu ‘llucisce, la Maria sta dorme ‘nchinu e face bonu cu se raposa ca crai cu pulizza e cucina ‘ddhu spattaculu te casciuli ave fatiare te taveru.


Curiscia cu la lenza

La Curiscia fritta (quiddha è la morte sua) e nu beddhu bicchieri te vinu ‘cconzene na mangiata te pesce cull’amici. La curiscia se pisca tuttu l’annu cu le paranze alli fundali ma alla varnata scinde a‘nterra e certe ote la trovi puru intra lu portu. Cu la pischi ‘ttocca cali na lenza cu l’amure crosse, civata cu nu stozzu te sarda e, comu tice ‘mparama Pici, “ci ‘nci suntu le pijamu”.


Fiacca

Na sera ca ‘nc’era nu quaju te mare, toi ‘nnamurati stavene queti queti ‘ssattati sulli scoji sotta le pentite, tuttu ‘ncoddhu ‘ntisara na oce ca ticia: “Ova… Sia!!!”, s’ane utati e ane vistu na varchiceddha a rime cu na luce te cetilene ca ‘ddhumava lu mare addhu passava; scia ripa ripa e ‘nc’era n’ommu a prua cu la capu ‘nfilata intra nu sicchiu cu lu vitru te sotta e na fosciana a ‘mmanu e n’addhu ommu ca rimava… Mentru passavene ‘nnanzi iddhi ‘ntisara ‘ntorna: ”Ova… Sia!!!”; quiddhu cu la capu intra lu sicchiu manau la fosciana a mare e ‘bba sale na beddha spinotta. ‘Ddha sera i toi ‘nnamurati vittara “puru”… comu se pisca a fiacca.


Mazza e focu

Na ota cu pischi nu ‘nc’erene tutte le tiaulerie te moi ca vitene a fundu ci ‘nci suntu pisci, quanti nd’ave e n’addhu picca te ticene puru la strappina loru. A ‘mmanu a pappacone, tanivi sulu l’occhi pe’ ‘bbìtere e le razze pe’ rimare e, ’ncapu a tuttu quiddhu ca li siri nosci nd’ane ‘maparatu, la pisca mazza e focu ete una te quiddhe. Una o toi varche caminene te paru: su una, a prua, ‘ncè ‘mpizzatu n’ommu ca cuarda a mare; quandu vite li pisci ‘mmuntunati, chianu chianu, senza cu li spauriscene, calene li riti ‘ngiru ‘ngiru e ‘mpena ane chiusu li pisci ‘nzignene a fuscire cu le varche intra lu circhiu spattendu le rime sull’acqua e ‘bbinchiandu cu na mazzareddha ‘nfacce la murata. Facene tanta te ‘ddhà vernia ca a fundu li pisci spaliggiati ‘ccappene intra li riti. Te sera la pisca ete la stessa ma quandu lu circhiu ete chiusu se ‘ddhumene li fochi te la lampara, li pisci ‘nci suntu, la mazza stà ‘bbinchia e la festa pote ‘nzignare.


‘Ngegnu

Se chiama ‘ngegnu ma la capu se usa picca! ‘Ncì olene toi varche, na rite beddha longa ca sale a ‘nzumu e la cosa ‘cchiù ‘mpurtante: l’ommini cu ‘ddoi razze forti comu stanghe te trainu. Li pisci se chiutene cu la rite a forma te circhiu e tira a me e tira a te se stringe comu nu saccu. Quandu sale a ‘mbordu sai ci ete nu saccu te sordi o nu saccu… te fatia manata allu jentu!


Pisca intra li buchi

‘Nc’ete cinca vae scioca a patrone cu l’amici cu se stona nu picca e quiddhi ca vane pischene intra li buchi. Certe sciurnate lu mare pare ca te chiama cu stai cu iddhu e caminandu ripa ripa all’acqua, cu na canniceddha curta curta intra na manu e nu sicchiu ‘nfilatu intra l’addhu razzu comu na femmana cu la urza te la spesa, cala na lenza intra li buchi ca se trovene tra nu scoju e l’addhu e te ‘ssetti mentru cuardi li cabbiani a ‘rretu le varche ca pulizzene le riti. Già tuttu quistu nde putia bastare ma mesciu marinu tante ote te face turnare a casa puru cu na beddha zuppa te pesce intra lu sicchiu. E ‘quai sì ca ‘nc’è cu ‘mbiti lu cumpare e senza mute cerimonie!


Rusacchiu

‘Nci suntu piscaturi ca tenene na beddha varca a rime te quattru cinque metri cu li tramaji intra la sannula, e piscaturi cu le pezze a ‘nculu ca tenene sulamente na pezza te rite te tre, quattru passi rutunda cu li chiumbi su l’armaggiu. Ma ci l’occhiu ete furbu e la manu è lesta, a ripa te mare, vasciu vasciu, ‘mpena vite lu pesce a ‘nzumu ula la rete all’aria e cate propiu addhu ave scire e, puru senza varca, ave strazzatu la sciurnata. Cosa te povarieddhi è ‘bberu, ma lu picca è meju te nienti.


Scire a corzie

La corzia, ca fatta cu lu sucu face cu te ‘llicchi le tiscete, se pisca te cusì: ‘ttocca se minta nu piscitieddhu su nu stozzu te fierru filatu e quandu le sicche te sciannaru facene ‘ssire li scoji te fore all’acqua, sa ‘mbicinare lu fierru a ‘nnanzi la carassa; comu esse la corzia mena la manu e ‘zzaccala ‘bbona… Statubbe ‘ncorti però, ca sanò le tiscete nù te le poti ‘lliccare ‘cchiui! La morte te le corzie ete quiddha cu nu beddhu sucu te cumitori, ca te face pruvare ‘nterra lu Paratisu!


Surta e Cernia

Na ota quandu ulivi cu pij na cernia o nu ‘ddottu, tuccava cu ‘rrimi pè nu paru t’ore te lu Cannitu a ‘rretu r’isula e, cu lu scandaju te chiumbu, eri ‘cchiare na beddha catuta te scoji; l’amura quantu tre tiscete, ca stava ‘ttaccata su na lenza crossa, era t’essere civata cu nu purpu scurciatu e l’eri calare a fundu. Su la lenza se ‘ttaccava na surta e quandu quista cuminciava a ‘ssambuttare capivi ca la sciurnata sta ‘nzignava a ‘ssire.


Togna

Quandu vai pischi la cosa ‘cchiù ‘mpurtante ete cu porti ’nterra lu pesce, ma quandu vai a togna, essi te casa cu ‘bbai te ‘ndafrischi la capu te tutti li panzieri. Te varnata o t’estate, pe’ na ‘bbona piscata a togna ‘nciole na beddha sciurnata cu nu quaju te mare, poi quandu te fermi cu la varca e meni lu fierru a fundu o te lassi scire a currente, ete comusia ca stuti na lampatina e pensi sulamente allu paraculu ca ai te mintire sulla palamara o allu chiumbu ca ete mutu leggiu. Mentru a punta te tisciutu tieni ‘mpisa la lenza cu sienti puru la tuccata te lu sciuteu, ula lu tiempu ca ete passata puru l’ora te li bufulachi e allora te nde torni ‘nterra e la salute ca te sienti ‘ncorpu, topu na sciurnata passata a piscare a togna, ete comusia ca ‘bbiti pijatu la ‘cchiù crande meticina ca putiti truvare allu mundu. Pruvati e poi me tati ragione! E lu pesce? Sia, poi sciati piscati veramente n’addha fiata.


Tracina

N’arte ca se facia già a ‘mmanu alli ‘ntichi, puru ca quiddhi ca sciene ‘bboni erene propiu picca. A mare (comu a ‘nterra…) “lu pesce crande se mangia quiddhu picciccu”; racordete quistu… poi pija nu filu te sita bellu crossu e minti, a pater nostru, tanti chiumbi ca bastene cu ‘ffundi la lenza addhu oi. Pija nu gefunu viu o na beddha acura piscata a ‘rretu a lu rafu e ‘ttaccala cu n’amura a ‘mbucca e l’addha alla cuta, ma senza cu la ‘cciti; passa e spassa su lu taju te fundu ca sai te e nu dottu, nu tantatu, na cernia o na mofia ca stae ‘ddhai pote resistere quantu nu masculu ca nde passa ‘nnanzi na beddha vagnuna cu li musi pittati ca lu cuarda e nde rite. Prima o poi lu fessa ‘ccappa, e ci brutta fine face! Quista è na rizzetta pe’ li palati fini e pe’ li cannaozzi ca se raspettene!


{tab=Tonnara}

La ‘Llavata*   –   La ‘mbitia te li paisi vicini*   –   La quarta canonica festiva*

 La rete*   –   La ‘ssuta a mare*   –   Li patruni te la Tunnara*   –   Parcé spicciau la tunnara*


Lu Regiu Decretu

Tra li tanti privilegi ca a ‘ll’antichità tanìa Caddhipuli ppe’ la fedeltà e li sarvizi resi a ‘lla Corte Spagnola, nc’era lu Regiu Decretu te lu Re Robertu T’Angiò speditu te la Spagna lu 2 settembre 1327 addhu vanìa cuncessu a ‘lla “Federissima cità de Garipoli” lu dirittu sempiternu ppe’ piscare li pisci te currente (e lu tonnu era unu te quisti) e lu dirittu te proibbire tale pisca a addhi piscaturi ca erene pututu piscare a ‘ll’acque nosce. Propriu ppe’ forza te ‘stu Regiu Decrutu, toi anni cchiu’ tardu, a ‘llu 1329, li caddhipulini ‘nzignara la pisca te li pisci te currente, ma ‘ccu sistemi truvati a ‘llu mumentu e senza organizzazione. Sulamente versu lu 1470 nascìu la prima tunnara organizzata ppe’ ordine te lu sinducu te tandu ‘Ntoni Speculizzi. Caddhipuli, crazzie a ‘lla tunnara, se ‘rricchiu ma la ‘mbitia te li paisi vicini foe crande e tante fiate, a ‘lli vari seculi, manara ‘ccu la fazzene ‘llavare. Farcincunu però se pijau lu custu ‘ccu denunzia li tonnaroti ca, secondu iddhu, nu’ pacavene le tasse su li tonni piscati. Cusì ficiara causa a Caddhipuli.

{AG thumbWidth=”70″ thumbHeight=”50″ thumbAutoSize=”width” arrange=”priority” backgroundColor=”ffffff” foregroundColor=”808080″ highliteColor=”fea804″ frame_width=”500″ frame_height=”300″ newImageTag=”0″ newImageTag_days=”30″ paginUse=”0″ paginImagesPerGallery=”30″ albumUse=”0″ showSignature=”0″ plainTextCaptions=”0″ template=”classic” popupEngine=”slimbox”}arte_e_mestieri/arte_della_pesca/galleria_artedellapescatonnara{/AG}



{tab=Posti dove andare a Pescare}

A foggia

Nù ete propriu nu ‘nzignale precisu ma stu locu stae propriu te facciffronte alla casa te le mattunelle. ‘Nc’ete propriu picca acqua, ca quandu te ‘nfacci te la varca a fundu viti nu sciardinu te alache e creminitu. Ci te lassi scire leggiu leggiu cu nu chiumbu te nienti e n’amura ‘mpisa te retu, li spetacaturi te ‘ssamene te sicuru. Ci poi taniti nefie ca li spetacaturi nù bè ‘ngorgene, lassati tuttu… ca sciamu nui!

Cetere

Lutrini, scorfini e pizzuti, belli pisci ca te inchene la ucca sulu cu li tici, ma ci oi cu li viti intra lu sicchiu tou quandu ‘rriva masciu-giugnu, minti lu crossu cu lu cumandante (ca vene a dire la capitaneria) e topu n’oretta te mare si ‘rrivatu. ‘Cchiati nu locu a mienzu all’addhe varche ca ci lu tiempu bè ‘ccumpagna ogni tantu sienti critare faccincunu ca tice “l’aggiu pijatu”! Poi te vene cu castimi ca tici “Eja, Signore… e sempre all’addhi?”; pacenzia ‘nciole, ca li viti ‘rrivare puru te cisaria su st’acque.

Core tu malone

Quandu a nu caddhipulinu ‘nde cunti te lu core tu malone se sente intra casa. Ci tieni propriu nu picca te tiempu e nù boi cu ‘zzumpi na beddha piscata, pija la varca, essi te lu cannitu, scapula u cagnazzu e stai già intra lu core tu malone. La cosa bona te stu locu ete ca ci oi cu te stoni n’oretta senza faci muta strata essi e si ‘rrivatu, e la cosa fiacca ete e ci “pè casu” ‘ddhu giurnu te porti la ‘zzita “cu pischi” e passa muierata te susu la muraja, lu pesce lu piji puru a ‘nterra ferma, quandu te ‘nde torni a casa… schiattarisciatu a ‘nfacce però!

Crossu cu le farrate

‘Cci buliti lu pesce pè nu brotinu cu la pastina beddhu, cautu cautu e sta scinditi sotta la chiazza? Fermi tutti, turnati ‘rretu, pijati la varca e… mintiti sempre lu crossu ma sta ota ‘mpuggiatu alle farrate, ca vene a dire li carciri te na ota; stai sempre a tramuntana ma lu fundu ete ‘cchiu vasciceddhu e chinu te petre. Li piscaturi calene le nasse, ma ‘ddhammienzu facci spariolu e fanni quantu na manu lu pischi sempre. Ci poi nù taniti la varca, nù canusciti li vecchi carciri addhu stane e uliti lu brotinu lu stessu… sciati sotta alla chiazza!

Crossu cu lu campu

Stae ‘ddhavia a tramuntana e se vite lu scoiu te lu campu ca cuarda Caddhipuli ‘mpuggiatu allu crossu, ca ete la muntagna te Castelforte; ‘nci suntu quattordici, quindici passi t’acqua e lu fundu ete tostu, ci te lassi scire a currente quandu ete tiempu te calamari ncè cu te ‘ddaverti te taveru. E tuttu stu ‘nnanzi ‘rretu te varche te pare comusia lu corsu Roma te tumenaca cu le machine e li cristiani ca salene e scindene cu se passene lu tiempu. Ma comu se tice? Ci perde tiempu nu pija pisci!

Li meju lochi

Li piscaturi suntu tutti fazzi quandu te ticene ci ane piscatu, e speciarmente poi ci tane te tire addhu stane li meju posti cu ‘bbai pischi. Ognunu te iddhi ete cialusu te li lochi soi te lu core e nu te li tice mancu ci lu ‘ppendi capisotta; ma alla fine li lochi nu suntu tanti, e ca “quasi” tutti poi li canuscene e perciò sta cosa ‘nde la putimu cuntare finarmente sotta lu sole cu la saccene tutti te taveru. Però capimunde, ca cu essi “propriu precisu” imu te tare toi coppie te ‘nzignali, ma una basta… ca sinò poi ‘mparene mutu! E perciò armatubbe te canne, lenze e ciu ca partimu.

Santa Vatiardia

Taniti tiempu e na beddha sciurnata te mare sta ‘bbe chiama cu piscati. Sta fiata sta ci be purtamu a nu locu luntaniceddhu, ca stae sotta all’uscentu, ma li piscaturi ‘cchiù ‘ncarnati ‘rrivene puru ‘ddhai. Lu acchi alle sicche te fore e ‘nciole fatta tanta strata cu ‘rrivi ma ‘nde vale propiu la pena. Poti scucchiare ci boi pischi e ci sai lu fattu tou quandu te ‘nde torni a casa lu pesce nu manca.

Sciali longhi

Camina camina e ogni tantu te oti ‘rretu e quandu viti a linterna ca scriscia lu crattacelu sta ‘nzignia lu locu te li sciali longhi. Ete a tramuntana e acchi nu fundu ca sale e scinde e ci cali lu scandaiu na ota cunti tritici passi e n’addra suntu vintitoi. Na fiata su na spaddra comu quista ‘nc’era ogni bene te Diu, ma puru moi cu la pacienza e lu iutu te lu “Patrunu te casa” te poti ‘ddivartire.

‘Ssurlinchia ripa u muru

Ci nu piscatore te cunta te “’Ssurlinchia” ui be panzati ca ete na brutta palora e ‘mbece stampagnati bonu la ricchia parcè sta cunta te nu locu spettaculare cu pischi. Cu lu acchi ai mintire la casa ca stae susu la turre te S. Catarina comu sia ca scriscia la spaddra te la muntagna ca scinde sotta a mare. A stu locu se acchene a fundu tante petre sulagne ca suntu pè li pisci comu nu sciardinu a ‘mmienzu na schienata te rena e cu la pacenza e nu picca te c… furtuna ci ‘mbastiti sti sciardini iti fattu carta china. Pè st’annu imu spicciatu, lu pesce l’iti pijatu ma però nù l’imu spartutu… Nui la sapiene ca nù ‘nde ‘bbuscavene nienti e ‘bbia raggione cinca ticia nù bè ticimu nienti; e mò sapiti addhu bè mandamu… cu piscati l’annu ci vene? ‘Ccattatubbe lu calandariu nou ca sapiti!

Tritici ciciri

Certe ote li lochi te mare tenene nomi ca se ‘nde venene te manu a Pappacone e quistu ete unu te quiddhri. Tritici ciciri stae allu mare te tramuntana e ai mintire lu Specchiu cu la linterna; nun’è facile cu lu acchi te precisu parcè ete nu tajceddhu, ma ci sai cu ‘rrivi ‘ddhassusu facci tantatu o nu beddhu dottu a tracina se potene pijare. E ui mo sta ‘bbè ciarcati: “ E li tritici ciciri, ci bene a tire?” Ma quante cose uliti cu sapiti…


‘Ttaccamboti

Stu nome te face panzare a n’ardicula ‘ddumata e lu ‘ndore ca se sparpaja pè tutta la casa… e ‘mbece ete nu locu speciale pè lu pesce, addhu ca carne! Sta ota mintiti sempre lu benatittu crossu cu la casa te le mattunelle e te acchi propriu a ‘mmienzu alla conca te sciaroccu. Li piscaturi, ca nù suntu fessi, partene te Caddhipuli e se facene na bella strata cu ‘rrivene allu taccamboti e calene riti e conzi, ma cinca s’ave fare sulamente na bella piscata quandu vite salire te fundu ‘ddhi faumi, ca parene tante cerniotte cu la ucca perta, beddhi e russi russi ca parene pittati, benaticene li piscaturi e quandu l’ane secutati.


Turre cu la Matonna

Mintiti la turre te Santa Catarina cu la Matonna ca stae te retu, susu la muntagna. Quistu ete nu ‘nzignale ca s’ave cuardare te luntanu e se ‘ncete nu picca te nija… all’addre vae. Se pisca bonu a tratta te ‘nzumu e nu sulamente a quiddhru. Ma ci nija nù ‘nd’ave… racurdatubbe cu spartimu ca sanò l’annu ci vene bè mandamu cu piscati ‘ggefini te chiavaca!


{tab=Pesci}

Aracosta*   –   Camberoni*   –   L’acure*   –   Li calamari*   –   Li capuni

Masculari*   –   Ope*   –   Palamite*   –   Tonni*   –   Pesce ‘mbiscu*

Ricciole*   –   Seccie*   –   Treje*



{/tabs}



Mestieri

mestieriGallipoli, la città dei pescatori, forse non tutti sanno che a Gallipoli non ci sono solo pescatori, ma soprattutto tanti altri mestieri, alcuni dei quali ormai dimenticati o quasi. Noi con questa rubrica vogliamo far conoscere ai nostri lettori chi e cosa faceva l’Acquarulu, lu Bifararu, lu Ferracavaddhi, la Mescia te tilaru, lu Mesciu t’ascia ecc..



Bifararo

Una volta la vita quotidiana delle persone era soprattutto di giorno, non essendoci luce elettrica per la sera, si diceva infatti che la gente “andava a letto con le galline e si alzava col gallo”. Le case erano illuminate solamente da quella fievole luce delle candele o delle lampade ad olio o a petrolio. Lungo le strade c’erano dei lampioncini a petrolio che ogni sera venivano illuminati dai bifarari, andavano in giro con lunghe casacche e una pertica in spalla, ed ogni giorno al calar del sole illuminavano le strade.

Stemmi e famiglie nobili

stemmi_e_famiglie_nobili
In origine lo stemma veniva riprodotto sugli scudi e sui vessilli dei cavalieri, per permettere di distinguere e riconoscere un intero gruppo di persone, sia nei suoi componenti che nelle sue proprietà. Anche se spesso si pensa che l’uso di uno stemma coincida con uno stato nobiliare, non è così: ad essere prerogativa nobiliare infatti non è lo scudo in se, ma l’uso di alcune ornamentazioni esterne allo scudo stesso.

Li Balsamu

Alli tiempi te Ferdinandu I te Aracona ‘sta famija te Messina se sparpajau ppe’ tuttu lu Salentu e bbiu te lu Re Carlu lu titulu te “Marchese”. Lu ramu caddhipulinu se ‘mparentau ‘ccu li Pirelli, li D’Ospina e li D’Aprile. Abbitàu intra lu crande palazzu ‘ccu lu purtale catalanu-durazzescu ca tae su’ Via ‘Ntunietta de Pace te fronte allu Seminariu. ‘ Sta famija tese quattru sindichi: Bonaventura (1732-1733; 1742-1743); Carlu (1747-1748; 1768-1770); Frangiscu (1773-1774) e Bonaventura (1799-1801). Quistu fice frabbacare a spese soi lu “Tiatru del Giglio” ca ‘na fiata passatu alla Comune pijau lu nome te “Tiatru Giuseppe Garibaldi”.


Li Briganti

Allu ticiasettesimu seculu la famija Briganti, ca vanìa te le vande te Bologna, se farmau a Caddhipuli e ‘nu ramu se stabbilìu a Racale te addhu poi turnàu allu 1766. Tommasu foe avvocatu e ‘nu drittu giurista. Lu fiju Falippu foe filosufu, giurista, pueta e scrisse puru tante opere te ecomonia. Paru ‘ccu lu Beccaria se vattìu ‘ccu pozza ‘llavare la tortura. Mutu canusciutu foe puru l’avvocatu Domenicu ca foe sinducu te lu 1842 allu 1851; Ernestu foe fattu vescuvu te Uscentu. Sullu parete te la casa addhu nascira Tommasu e Falippu nc’ete murata ‘na lapita te marmuru ca  li racorda.


Li Calò

Te origini te sicuru creche, ‘sta famija se sparpajau a muti paisi te la Puglia. Li Calò te Caddhipuli se spartìra poi a doi razze tiverse: una rrumase a cquai e l’addha se nde scìu a Bitontu. Li Calò te Caddhipuli fora tanti ma lu cchiù canusciutu foe Matteu ca cumbattìu alla battaja te Lepantu allu 1571. Te ‘sta razza fora puru quattru sindichi te Caddhipuli tra lu 1516 e lu 1708. L’urtimu tiscendente foe Silviu ca se fice prevete e murìu allu 1760 mbuzzandu perciò la razza.


Li Coppola

Se ‘nzigna a cuntare te li Coppola, vanuti sacondu certi te la Sicilia, già allu quindicesimu seculu. Tanti su’ stati li cristiani ca ane fattu crande ‘sta famija: Giuvanni Carlu, vescuvu te Muru, foe crande littaratu e scrisse tante opere sacre; una te quiste “Le Nozze degli dei” foe rappresentatu alla Corte te lu Gran Duca te Toscana; Giacintu, puru quistu crande littaratu, ca scrisse allu 1594 “Il plettro armonico”; Ercule, vescuvu te Nicotera allu 1651; ma lu cchiù canusciutu e ‘mpurtante ete ‘ncora osci lu pittore Giuvanni Andrea: Sant’Acata, e nu’ sulu, ete china te quatri e tele soi.


Li D’Acugna

Te origine spagnola, sta famija vinne a Caddhipuli ‘ccu Pietru te li Marchesi te Sant’Elena e abbitàu lu palazzu te lu 1500 osci chiamatu Granafei te fronte allu Museu. Lu cchiù canusciutu foe lu Capitanu Frangiscu D’Acugna mortu ‘ccisu lu 19 masciu 1630 e racurdatu puru parcè lassau sullu palazzu ‘na scritta a spagnolu te lu 1635 teticata a Falippu IV Re te Spagna ca se legge bona ‘ncora moi. La famija era patruna te la “Foresta di Gallipoli” titta puru “Danniferenti”. Giuseppe (1623-1624) e Pietru (1758-1759) fora sindichi te Caddhipuli.


Li De Tomasi

‘Sta famija bbiu lu titulu te “Conte Palatino” ‘ccu Diegu versu la fine te lu diciassettesimu seculu. Abbitau lu palazzu ca tene lu purtale ca bbatte versu lu portu te lu Cannitu e ca ete canusciutu comu purtone “trasi-essi”. Te beddha vituta era puru lu sciardinu ‘ccu n’artistica scala a balaustra. ‘Nu ramu te li De Tomasi fice famija a Caddhiste e Feddhine. Tese a Caddhipuli cinque sindichi. Giambattista allu siticesimu seculu foe giutice te la Gran Corte Criminale e puru storicu, littaratu e archeolucu.


Li D’Ospina

La famija D’Ospina se stabbilìu a Caddhipuli versu lu 1564 ‘ccu lu Cran Capitanu e Governatore Ernandu ca se ‘nzurau ‘ccu ‘Lisabetta Altese. Abbitàu lu palazzu te via S. Angiulu addhu nascìu ‘Ntunietta de Pace; l’urtimu tiscendente murìu allu XIX seculu. Li D’Ospina se ‘mparentara ‘ccu li Balsamu e poi se ‘mpussessara te tuttu lu patrimoniu te la famija Venneri e pijandu te tandu lu tuppiu cugnome D’Ospina-Venneri.


Li Micetti

Nobbile famija te Tricase se trasferìu a Caddhipuli allu ticiassettesimu seculu. Carlu V lu 24 fabbraru te lu 1535 tese a ‘stu casatu lu tiploma te “Cavaliere Aureo” ca foe cunsegnatu a Giovambattista. Li cchiù canusciuti te ‘sta famija fora toi sindichi e Leonardu Antoniu ca scrisse “Memorie di Gallipoli”. Lu manuscrittu te st’opara se trova ‘ncora osci alla Biblioteca provinciale te Lecce. La via Micetti pija lu nome te lu palazzu te famija ‘ttaccatu allu palazzu baroccu te li Doxi-Stracca.


Li Patitari

Nobbile e ‘ntica famija te Caddhipuli, ippe tiscendenti puru a Taruntu addhu era patruna te lu feudu te Adoa a Massafra. Padanu Patitari foe giurista e ‘mbasciatore te Alfonsu t’Aracona ppe’ la citate te Taruntu. Bartulumeu Patitari scrisse lu manuscrittu “Gallipoli sacra” addhu cuntava te li vescuvi, li previti e le chesie te ‘stu beddhu paese. St’opara stae zzata alla Biblioteca Comunale noscia. Te ‘sta famija erene Alvise e Ragonese mutu dritti ppe’ frabbacare cannuni e campane te bronzu. ‘Ncora osci a tante chesie e massarie te lu Salentu sonene ‘ste campane. Cinque tiscendenti fora sindichi a ebbuche tiverse.


Li Pirelli

‘Ccu lu stessu cugnome risultene toi famije nobbili tiverse; la prima, spicciata all’Ottucentu ‘ccu Pasquale Pirelli, tese allu paese, te lu 1537 allu 1805, 14 sindichi; la saconda, ca era patruna te li Casali te Nevianu e Torrepaduli, tese lu sinducu Giovambattista te lu 1660 allu 1661. Abbitava intra unu te li cchiù beddhi palazzi ca face angulu te fronte sant’Acata e ca osci ete te li Arlotta-Provenzanu. Mutu beddha ete la loggia barocca ‘ccu l’arcu e la làmia tutta pittata su’ parete addhu se vite ‘ncora lu vecchiu stemma te la famija ‘ccu l’arbulu te piru e ‘ccu doi “liuni rampanti” ‘mpizzati te coste.


Li Ravenna

Vinnara a Caddhipuli ‘ccu Stefanu, ‘nu cummericante te Lavagna, ca era sire te lu cchiù canusciutu Bartulumeu ca pubbricau a Napuli le “Memori istoriche della citta di Gallipoli”, Giuvanni foe sinducu alli primi anni te lu 1900 e Deputatu te lu Parlamentu italianu. Alla famija foe tatu lu titulu te “Cavalierato di Gerusalemme”. Le insegne te st’ordine stane pittate sulla làmia te lu palazzu neoclassicu frabbacatu alla via Fontò allu 1850 allu locu tittu “Curte te le materazzene”.


Li Rocci

Famija tiscendente te Sancio ca era castellanu te Caddhipuli allu 1496. Se pensa ca lu cugnome Rocci o Roccio vene propriu te lu castellanu ca te ngiuria facìa “Rosso” propriu ppe’ lu culore te la varva. ‘Sta famija pijau lu cugnome Rocci-Cerasoli e de cquai vene l’insegna nobbiliare ‘ccu n’arbulu te ciarasa ‘ccu lu muttettu: MODESTE VIRESCIT SUMPTA LIMPHA. Se ‘mparentau ‘ccu quasi tutte le famije nobbili te Caddhipuli e tese muti sindichi ‘nzignandu te Giuvanni Carlu allu 1543. Abbitau intra lu palazzu addhu osci nc’ete lu Municipiu e sou era puru lu palazzu Arlotta ca stava te coste, sulla via Garibaldi.

Personaggi di ieri e di oggi

personaggi_di_ieri_e_di_oggiCon questa rubrica vogliamo far conoscere ai nostri lettori alcuni personaggi, di ieri e di oggi, che o in un modo o nell’altro, hanno valorizzato o continuano ancora a valorizzare la nostra bellissima città.



 Crisosti – Latino Crisostomo

Nà… mo ‘bbè cuntu nu fattarieddhu!!!

Era la festa te Santa Cristina e a Caddhipuli, comu sempre, ‘nc’era nu scumpiju te ‘ggente; sullu scivulu te lu Cannitu se mintiene sempre quiddhi ca vindiene li maluni e le fiche e, puru ca stavene in discesa, se fitavene li stessu cu fazzene crandi muntuni te maluni. Topu lu sparu te li fochi te menzatia ‘ddhavia allu Lazzarettu, nu cristianu se farmau cu lu sciarrabbà ‘nnanti lu ponte, mentru tutti stà ‘ssiene ‘ddhaffore allu burgu; stù cristianu vitte tre vagnuni ca, vastuti a panni te unu, caminavene cu li cazzi te mare, li chiamau e nde ‘ddummandau ci uliene se ‘bbuschene 5 lire patunu. Putiene tire te no? Erene fare na cosa sula: s’erene manare a mare, senza cu se ‘ddhuna ciujeddhi, erene scire addhu stava lu muntone te maluni cu ‘llevene quiddhu te sotta; ca siccome li maluni stavene a discesa putiti ‘mmagginare ui comu rotulavene mentru all’acqua, menzi spaccarisciati, menzi sani… Tutti li cristiani se manara a mare cu se racojene li maluni sani, li piccinni se manara a quiddhi spaccarisciati e li poviri tiscrazziati te le barracche erene tesparati! A nu ‘ccertu mumentu nu cristianu nu se ‘mbicinau a iddhi e li pacau tutti ticendu ca quiddhu era nu giurnu te festa pè tutti. ‘Bbè lu racurdati ci era? Foe lu stessu cristianu ca a carniale mentru l’addhi manavene caramelle, iddhu manava caramelle e… sordi! Te nome se tania Latino CRISOSTOMO, ma era meju canusciutu comu lu ”CRISOSTI”.


La Cummaruzza – Olivia Camisa

Olivia CAMISA… trorà ca nu ‘bbè tice nienti ma ci la chiamamu “la Cummaruzza”? Quanti te nui su passati te taveru te le mani soi?! Era te Sannicola e ‘mparau l’arte te la mammana, ca ete quiddha ca osci face l’ostetrica. ‘Ncè te tire ca lu mestiere iddha nu lu facia pe’ cuntu sou; tandu tutti li vagnuni nasciene a casa e nu certu allu Spitale (addhai sciene sulamente quandu ‘ncerene problemi crossi), e iddha la pacava la Comune cu ‘ssista cinca parturia. Quanti piccinni ave vistu nascire e quanti travaji ave ‘bbutu “la cummaruzza” vistu ca all’ebbuca se fatiava pè comu ulia Diu. Tania nu carattere forte e la truvavi sempre disponibile, notte e dia. Lu mottu sou era quiddhu: “Se lassa lu murire pe lu parturire”, ulia cu dica ca è meju ‘ssisti cinca à partuire ca cinca sta more. Povara cristiana: turmia sempre cu n’occhiu pertu parcè a cuarsiasi ora la chiamavene, iddha era pronta cu fazza nascire lu piccinnu. Era capace cu capisce ci era ‘rrivatu lu momentu, e ci se ‘rreculava ca ‘ncora nde ‘nci ulia, metruttantu fuscia a n’addha cristiana. Ci poi, mancu li cani, ‘ncerene prubblemi, iddha stessa chiamava lu metucu. Lu compitu sou, topu la nascita, spicciava quandu allu piccinnu nde’ catia lu vaddhicu. Pè tuttu quistu e nu sulu, era cunsitarata la ”cummare te tutti”!!!


Lu Biascu – Gerardo Biasco

Gerardo BIASCO nasciu allu 1858, criau na crande frabbaca te utti a la sciuteca addhu se sarviene te tutta la pruvincia. Nde piacia la musaca e sapia puru cu sona lu mandulinu e la chitarra; trorà ca foe propiu pè quistu ca nde vinne l’idea cu fazza nu tiatru allu burgu, addhu se putiene tare spattaculi te crande musica. Se la mise ‘ncapu e lu fice, tuttu te legnu, e lu chiamau “El Dorado”. Li vicini te casa ticiene ca lu tiatru nde scundia lu panurama e ‘mbece erene sulamente cialusi te lu successu te lu tiatru tantu ca na notte nde lu misara a focu. Lu Biascu, capitostu, nu se tesparau e lu frabbacau ‘ntorna ma… stà fiata lu fice te cuzzetti e lu chiamau “Teatro Nuovo”. Vaniene le meju cumpagnie te opere, operette e vinne puru lu famosissimu tenore Tito Schipa te Lecce e pe’ ricunuscenza nde misara lu nome sou a lu tiatru. Muriu allu 1926, ma certi cristiani nun’erene murire mai!


Mesciu Ninu Trumbetta – Giovanni Carrozza

‘Bbe “sona” nienti a ‘ncapu ci cuntamu te lu Giovanni CARROZZA? E ci ‘bbè cuntamu te “Mesciu Ninu Trumbetta”? Trorà ca tutti lu canuscimu mutu meju te cusì, stu barbieri ca tania lu salone a ‘mmienzu tra la chiazza e lu Museu Civicu; ma nu scia tantu pè ‘ndumanata pe’ varva e capiddhi quantu pe’ lu mandulinu ca sunava cu maistria, puru capisotta. Lu salone sou era sempre chinu te musicanti e lu state se ‘ssattavene te fore e ‘mpruvvisavene spattaculi musicali ca raccujene nu saccu te forastieri. Paru cu mesciu Ninu sunavane spessu e volantieri lu Cintuzzu alla chitarra e lu Pippi ‘Zumba alla fisarmonica; farci fiata se truvava puru Don Pippi Leopizzi cu la mandola de l’Alfretu. Tania poi nu motu particulare cu sona lu mandulinu: se lu mintia ‘rretu lu coddhu o a’ncapu e, puru senza cu biscia le corde, furmine ci sciarrava mai na nota. Fice storia quandu partecipau e binse puru alla “Corrida”. Quandu se facia natale, purtava a ‘ngiru cu l’amici la Pasturale e quandu trasiene intra casa alli cristiani (prima era usanza) se ‘ccuntantavene te na pittula cauta e te nu beddhu bicchieri te vinu.


Mesciu Simone – Simone Giungato

Te lu topuguera mentru all’anni ’70 a Caddhipuli ‘nc’era na falignameria addhu fatiavene, comu oparai e dascibbuli, a ‘ntuttu na vintina te cristiani; la strata era “Via Micetti” ma tutti se la racordene comu “la strata te Mesciu Simone”. Lu nome sou ete Simone GIUNGATO e tene la bellezza te 99 anni, cu l’aucuri te na bona salute! Faligname e mobbiliere ave frabbacatu mobbili te ogni tipu e qualità. Li ‘zziti prossimi cu se ‘nzurene, sciene n’annu prima a Mesciu Simone cu ordanane lu mubbiliu, te cusì iddhu, topu ca se preparava l’ossatura te li mobbili, la facia staggiunare pe’ 6/7 misi. La sposa, ca pe’ dota era purtare la cambara te jettu, scia a Mesciu Simone cu la stampa te lu mubbiliu ca ulia, macari pijata te farci rivista, e poi ‘nci panzava iddhu cu fazza tuttu. Mesciu Simone è statu puru nu crande ebanista; lu piacere sou era cu ‘mpelliccia e lucida li mobbili cu l’arte ca sulu nu brau ebanista putia fare. Tanire nu mobbile te Mesciu Simone intra casa era vantu pe’ li cristiani e, ‘ncora moi, le coppie te na ‘ccerta età se vantene cu ticene ca tenene la cambara te jettu te “Mesciu Simone”.


Papa Censi – Don Vincenzo Liaci

Don Vincenzo LIACI (o Papa Censi comu nde piacia cu lu chiama lu storicu Nicola Vacca ca pe’ anni ave tanutu na crande currispundenza e tanta passione pe’ li studi e le ricerche te storia) tania nu crande amore pe’ Caddhipuli e la storia te lu paese. Nasciu a Caddhipuli allu 1917, sciu allu Seminariu Vescovile te Mulfetta addhu spicciau li studi te filosufia e teolugia; foe cunsacratu prevete lu 1 agostu 1943. ‘Ddavantau Parrucu te San Frangiscu Longu (San Frangiscu te Assisi) allu 1947 e foe iddhu ca tandu se mise cu restaura stù tempiu francescanu. Scriviu tanti saggi sulla chiesia e sull’arte e tania nu crande caicchiu, quiddhu cu face allu Cumentu te l’ex Riformati nu museu su Caddhipuli e la sua storia, tantu ca racozze tanti tocumenti e opare t’arte ca poi scira perse. Muriu tuttu ‘ncoddhu te espara, lu 22 luju te lu ’60, lassandu nu crossu tispiacere a tutti li caddhipulini. Te Papa Censi ‘ndane ‘rrumasti tanti articuli ca ave scrittu sulli giurnali.


Papa Nanu – Sebastiano Natali

Nasciu a Caddhipuli l’11 marzu te lu 1887; ‘rrumastu orfunu te sire a 4 anni, sciu cu abbita fore allu burgu cu lu nonnu. Spicciati li studi allu 1900, trasiu l’annu topu allu Seminariu e te cusì spicciau li studi classici e filosofici. Tania già tandu nu chiou fissu: ulia cu fazza, allu burgu, l’istitutu pe’ la tucazione te li povarieddhi e na chiesia. Lu 12 dicembre te lu ‘12 foe fattu prevete e topu toi anni lu Vescuvu Muller lu fice Rettore te lu Seminariu e patre spirituale te la Cungreca te lu Rosariu. Allu ‘16 foe numanatu parrucu alla nova parrocchia te lu Cannitu, ma lassau subbitu parcè ‘nzignau la cuerra e foe chiamatu a surdatu. Foe Cappellanu militare a Lecce e turnau a Caddhipuli allu ’19; topu n’annu, scettau le basi cu frabbaca na chiesia nova (lu Sacru Core) e ‘ddoi case pe’ la gioventù. Lu pijara tutti pe’ pacciu ma iddhu se ‘ncapuniu tantu ca allu ’22 la Comune nde tese lu solu e allu ’30 ‘nzignara li lavori. Lu primu istitutu foe inaguratu l’8 dicembre 1930 cu lu nome “Michele Bianchi”, ca poi ‘ddevantau ”Opera Pia Sacro Cuore” pe’ le femmene, e topu la seconda cuerra (ottobre te lu ‘56) spicciau lu “Villaggiu te lu Fanciullu – S.Antoniu” (Li Salesiani) pe’ li masculi. Muriu comu nu povarieddhu allu ‘spitale te Lecce e lu purtara intra na misera cambara te li salesiani; era lu 2 ‘Brile te lu ‘67.


Pici te L’acquaLuigi Monterosso

Lu Pici te l’acqua, allu seculu Luigi MONTEROSSO, ete nu cristianu umile ca ave tatu te mangiare alli piccinni soi cu l’arte te l’acquarulu. Quandu a Caddhipuli nu ‘nc’era l’acqua intra le case, era lu Pici ca ‘nchìa le utti e le purtava alle famije. Tania nu trainu tiratu te nu ciucciu e sei utti ca ‘nchìa alla Funtana Creca; quandu l’acqua te la Funtana nu ‘mbaliu ‘cchiui scia a quiddhe ca stavene sparpajate pè lu paese e ci ‘nc’era ‘ggente ca ‘nchìa buttije o menze, spattava lu turnu sou. Quante fiate lu vitivi cu le utti ‘ncoddhu salire toi o tre piani e, tutta ‘ddha fatia, pè 30 o 40 lire a utte. Nu tania e nu tene vizzi, nè lu vitivi mai intra li circuli o le taverne cu se tira la ricchia; iddhu fatiava sempre. Trorà è statu propiu pè quistu ca tutti li cuatri o litratti ca ane ‘mmurtalutu lu Pici te l’acqua, lu viti sempre o susu lu trainu o cu la utte a ‘ncoddhu. Nù crande lavoratore o, comu ticimu nui, nù veru ciucciu te fatia! Aucuri te bona salute Pici!


Pizzazzara – Damiano Monterosso

Alli tiempi ‘ntichi nu ‘nc’erene nè ratiuline, nè televisiuni e nè machine cu li mecafuni cu pozzene vandisciare le nove allu paese. Ci ‘nc’era na riunione te confratelli a na chiesia, ci ‘llavavene la luce o l’acqua pe’ lavori, ci se truvava na cosa t’oru (tandu ca erene onesti), o ci ‘nzignava la nuvena te farci Santu, ‘nzomma quandu uliene cu sparpajene na cosa alli quattru jenti… ‘nc’era lu Pizzazzara (lu veru nome sou era Damiano MONTEROSSO), ca a ‘ngiru pe’ Caddhipuli vandisciava. Cu na manu spattia la campana, cu fazza ‘ssire le cristiane te le case, e cu l’addha ‘nnanzi la ucca critava: “Ci ave persu, te oru, lu bracciale?”; oppuramente: “Stasera, sulla chiazza pubbrucu cumuziu te…” ; e ‘ncora: “Martatia, topu mangiatu, alle toi ‘bbè chiutene l’acqua e ‘bbè ‘llevene la luce ”. Addhi tiempi, addhe uci te chiazza…


Proessò Cultura – Luigi Coltura

Quante fiate ‘bbiti fatti nu giru te muru e, ‘nnanzi la Chiesia te lu Malatrone, ‘bbiti farmati cu santiti li fattarieddhi te lu Proesso’? Luigi COLTURA, ‘ndumanatu “Proessò CULTURA”, era nu piscatore te quiddhi fini ca, cosa veramente strana pè li tiempi soi, fice le scole erte, nienti te menu mentru allu Ginnasiu (pe’ quistu lu chiamavene lu proessò). Era sempre allecru e cu na varva longa. Le fotocrafie soi, mentru ‘rrapezza li riti, ane fattu lu giru te lu mundu; li forastieri se farmavene cu lu cuardene mentru fatiava all’arte sua ( era ommu te terra) e iddhu se purtava ‘mpressu nu saccu te cartuline e fotocrafie soi, e lu presciu sou era cu le fazza vitire a tutti. Cu scioca li vagnuni se ‘nturtijava la ricchia intra, e quandu lu vagnone nde tuccava lu nasu la ricchia scattava fore comu na molla. Stava sempre ‘ssattatu ‘nnanzi le riti e siccomu tania problemi te ricchia, quandu cuntava critava e lu mottu sou era “sienti me, proessò”. Fatti veri, fattarieddhi, moti te tire, tiritere, canzunette te na ota… ‘nsomma nu spicciava mai te cuntare e tante ote, pè comu te le ticia, ‘babbavi. Tania puru na beddha oce e, a tiempi soi, nu mancava cu lu chiamene cu fazza saranate; tandu, lu cavaddhu sou te battaja era “Cancello tra le rose”. Pè cinca se lu racorda, quandu moi gira la patella trorà ca lu vite ‘ncora, ‘ssattatu sulle riti ca sta fatia e ca quandu passi sta te saluta alla sua: “Proessore mio…


 Totò Coluccia

Lu Totò COLUCCIA era nu metucu ca ave abbitatu pe’ tant’anni allu Palazzu Tafuri. Era specialista te le malatie te la pelle e lu ‘cchiavi sempre dispunibbile, soprattuttu pe’ la povara gente. Quandu visitava li poviri cristiani, ci nu taniene sordi se ‘ccuntatava puru te na mangiata te masculari e de moneche te la scaleddha. Tania la passione te le poisie a’ndialettu e tra le tante bè racurdamu “Lu mascularu”, “Lu ‘Mmalatrone” e lu tialugu tra “Lu cuggione e la pausa”. Ave scrittu puru “Opusculi te casa noscia” . Nu ‘nc’era natale ca nu ‘mbitava l’amici cu sonene la Pasturale, comu nu ‘nc’era viscilia te la ‘Ndulurata, era cunfratellu te lu Carmunu, ca la sera, topu li Sacri Uffizzi, cu “l’amici te chiccara” nu se ‘ssuppavene li cannaozzi. Pè nu dare mancamentu, la cosa se ripetia puru quandu sciene alle feste alli paisi te quannanzi. A’ fattu tantu bene a tutti e pè tutti era n’amicone ca nde piacia stare a cumpagnia… macari cu nu piattu de “pezzetti”.


Ucciu Scarpina – Antonio Scarpina

Antonio SCARPINA” è statu lu ‘cchiù crande costruttore te carri te Carniale ca Caddhipuli ave ‘bbutu. Quasi tutti quiddhi ca moi facene carri su passati te sotta a iddhu e ane, comu se tice, ciarcatu cu ‘rrubbene l’arte. Te mestieri facia lu mesciu carpentieri ma la passione sua vera erene li carri te carniale ca ave fattu sempre a tanti lochi sempre mutu ‘cchiù piccicchi pe’ quiddhu ca era veramente capace cu fazza. Facìa certe opere t’arte ca ‘bbabbavene crandi e piccicchi e cu iddhu, la cumpetizione era veramente tosta. Tuttu lu manufattu era opara sua; te lu prucettu te ‘ngegneria a quiddhu te li stampi te gissu ca usava pe’ li pupi te lu carru. Tania na capu tosta, ma cusi tosta ca s’era te fare sempre comu ticia iddhu e tante fiate se scannava cu li Cumitati o cu quiddhi te la Comune parcè li carri ca facia, quasi sempre, nu passavane te lu Corsu, e li sciungia cu tajene arburi, cu ‘llevene o cu girene le ‘nsegne e via ticendu. Scannamenti quanti ‘ndoi, ma puru ca se ‘rraggiavene alla fine faciene ‘ddha fatìazza cu piacire parcè lu carru te l’Ucciu nu putia mancare allu carniale. Se ‘ndà sciutu senza cu biscia realizzati li toi sogni ‘cchiù crandi ca tania: la scola te cartapista e nu capannone crande e comutu cu pozzene fatiare li mesci cartapistai tutti. Na ota, pe’ prutesta, se fice la sfilata cu nu carriceddhu picciccu picciccu fattu a casa, ma ca poi nde lu fice cutire comu si deve topu tanti anni: ‘bbe’ lu racurdati quiddhu te li pajiacci? L’Ucciu Scarpina nu era sulamente nu cartapistaiu, ma puru pittore e scurtore e tante suntu l’opere ca ave lassatu ca se pote racurdare propiu comu mesciu:”Mesciu Ucciu Scarpina”!


LE TABBACCUSE

 “Fimmene, fimmene”

Fimmene, fimmene ca sciati allu tabbaccu

‘ndè sciati a doi e ne turnati a quattru.

Ci be la tice cu faciti lu tabbaccu

la ditta nu be tae li taraletti.

Ca poi li sordi be li benaticu

cu be ‘ccattati nuci te Natale.

Te dicu sempre cu nu chianti lu tabbaccu

lu sole è forte e te lu sicca tuttu.

Fimmene fimmene ca sciati alle ulìe

Cujtendè le fitte e le scijare.

Fimmene fimmene ca sciati a vindimmare

E sotta allu cippune be la faciti fare.

E’ lu cantu ca ‘ccumpagnava la fatia te le femmene allu fore, ma ete nu cantu puru te prutesta te le lavoratrici te la campagna e ‘nnanti te tutti te le tabbaccuse, famose puru pè le lotte sociali ca iddhe prima te tutte quassotta a nui, ‘bbira lu curaggiu cu fazzene e alle ote puru cu bincene. Famosu foe lu scioperu te lu 1925, ‘mmanu allu fasciu, quandu mijare te cristiane sfilara a curteu pè le vie te Lecce ‘nnanzi alla pulizia.

Le tabaccuse caddhipuline

Ci l’ave titta, cristiani mei, ca na ota Caddhipuli scia a ‘nnanzi sulu crazie alli uttari, allu frantoiu e alli piscaturi?

Quandu te quai a ‘ddhai passava nu miju e menzu, parcete li mariti nù sciene a mare pè le labbiggiate, ci ‘bbè panzati ca li campava li fij? Le femmene! Alla matina, o cu lu friddu e lu jentu o cu lu cautu ca spaccava le petre, a ‘ncavaddhu te lu ponte fusciene all’enteriforme. Addhintra se chiutiene, te ‘mpena luciscia a quandu nù scuria. Be pare picca? Tantu te cappieddhu a ‘ddhe mamme: racurdamule e ringraziamule.

Enteriforme”: te cusine la chiamavene le nonne nosce la frabbaca te lu tabbaccu, e stava luntana te lu paese! Addhu ca moi ci nu tanimu le quattru rote cu giramu l’angulu nù sciamu mancu ‘ccattamu lu pane. Lu tabbaccu se fatiava a ‘ddhassusu all’arbacani, alla frabbaca te lu Starace, ca le femmene chiamavene “la Picciurella”; poi ‘nde ‘bbia n’addha, propriu ‘nnanzi la funtana creca, la frabbaca te lu Tricaricu, ca tutte chiamavene “te lu ‘Nnicciu”. N’addha ‘ncora stava susu allu Corsu Italia, e le femmene se partiene a pieti te caddhipuli vecchiu cu ‘rrivene a ‘ddhassusu a orariu ca sanò la mescia le critava.

Iti te sapire ca comu fatiavene le femmene tandu allu tabaccu era nà cosa veramente penosa, tantu ca lu sciannaru te lu 1946 se ‘ncurdara e ficera nu crande cungressu pruvinciale a Lecce. Allu cungressu ‘nc’erene puru tutti li sindacati e l’organizazziuni te li lavoratori e le lavoratrici; cuntara te li prubblemi te le tabbaccuse te tutta la pruvincia. Alla fine te lu cungressu tutte le cristiane ‘ssira ‘mmienzu le strate cu prutestene. Ficera curtei longhi longhi, a Galatina, Melissanu, Campi Salentina, Curijanu, Casaranu, Caprarica, San Pietru in Lama e puru a Caddhipuli. Nù ‘ssulu: li sindacati, nù cuntenti, organizzara a nuvembre nu crande scioperu generale te tutte le tabbaccuse e foe pè merutu te tutti sti ‘ssumbramenti ca ‘bbira oce cu cerchene e finarmente cu pijene l’aumentu e l’assegni famijari, cusì comu li tavene tandu sulu all’ommini.

Alle sette ‘nzignavene cu fatiene lu tabbaccu, ca nù ‘bbania sulamente te le campagne caddhipuline ma alle ote ‘rrivava te fore; a fiate te Lecce e te li paisi te ‘ddhannanzi, addhe fiate te fore propriu. Ma tocca sapiti ca ci lu chiantava e lu criscia nun’erene sulamente li masculi, ma puru le femmene. La terra noscia ete na terra grassa e lu tabaccu ca pijava era lu “levantinu”, ca poi ete nu tabbaccu mutu forte, robbustu e puru brafumatu. Se ‘nzignava te fabbraru, quandu se ‘ccunzava lu semenzaiu e la semina. Quandu scapulava lu mese ‘ssiene le chiantine, ca poi se chiantavene a masciu. Se facia settembre, quandu le fujazze le ‘cchiavene beddhe e mature, e se ‘nzignava la raccoddha: le tabbaccuse cu lu panaru te la marenda, cantandu filastrocche cu se ‘ccumpagnene la fatia te ogni giurnu a ‘mmienzu le campagne. E ‘ddhai passavene la sciurnata, cu lu friddu ca ‘ndè ‘ntustava l’anche ‘ndè scialava la fronte. Lu Tabbaccu, topu ca vania schiantatu e purtatu alle frabbeche sparpajate pè tutta la pruvincia, passava te manu a manu prima cu pozza ‘ddevantare bonu pè bindire: quandu ‘rrivava te la campagna, vania fatiatu te le spianatrici. Cinca facia la spianatrice tania l’anserta cu lu razzu ‘mberzu, poi cu tutte toi le mani standia le fujazze a una una, belle belle, ‘mpuggiate sull’anca taritta.

Nonnama ’Nnanza, bunanima, me ticia : “Me ’ndè scia alla matina cu lu friddu ca me spazzava le maniceddhe, tania sulamente na tiecina t’anni, ‘ssia te casa cu l’occhi te sonnu paru cu mauma. Sirama era mortu e tuccava a me cu jutu la barracca, ca tania toi soru addhe te mandare ‘nnanzi.

La mamma ‘ccattava, te passaggiu, toi stozze te pane, nu sordu te ulie e menzu sordu te oju cu ‘ndè ‘cchiumbamu lu stommucu a menzatia, e fusciene ca pè le sette ‘nd’erene ‘ssattare su ‘ddhi scanni mari… Era cusì piccicca ca quandu passava lu cuntrollu, mauma me scundia intra le casce e me ‘ngucciava cu li teluni. Tandu cu la fatia nù se scherzava; tutti timiene le mescie, parcete sapiene ca na parola te ‘cchiui allu patrone ‘ndè facia licenziare, e poi… a ‘ttrovala la fatia, ca putivi cacciare l’erva ‘mbucca! Ma ci te scia ‘bbona trasivi te vagnuna ma ‘ssivi cu la pensione”. Quistu era na cosa ca le tabbaccuse te tandu sapiene bonu e faciene te tuttu cu fazzene sempre lu tuvere loru, parcete mentru a quarche tecenniu a ‘rretu ste cristiane, na fiata ca trasiene intra la frabbaca e se cumpurtavene bonu, ‘rrumaniene puru topu ca se ‘nzuravene. Ci addhu tandu se putìa parmattire na fatia sicura comu la loru?

Le tabbaccuse erene te fare sette-ottu chili te tabbaccu allu giurnu. Ci faccincuna era ‘cchiù lenta, la mescia, ca poi era la cristiana te fiducia te lu cuncessiunariu, le critava; iddha stava sempre ‘ddhai ‘mpetucunata cu cuarda le tabbaccuse fatiare, facia respattare lu salenziu, ca senza pitteculisciamenti ticiene ca se fatiava te ‘cchiui, e alla fine ‘ndè pisava lu tabbaccu fatiatu. A certe manifatture mintiene puru la musichetta pè tutta la sciurnata te fatia. ‘Nc’era na forte tisciplina e tante ote, ci le cose nù sciene comu ticiene li capi, ‘nc’erene puru multe e suspenziuni; ‘nc’era puru ci fatiava sempre e ci se ‘ndè scia a casa, parcè le mesce ci te pijavene a simpatia te tavene lu pane mentru faccincuna addha, parieddha mia, putia puru murire te fame. Cu pozzi refiatare nu picchi ‘nc’era na “menza”, ca poi nun’era addhu ca nu cuppinu cu nu picca t’acqua addhu tutte iddhe, una alla fiata, ‘mpuggiavene li musi e viviene ma sulamente a na certa ora, scapulata quiddha nù te faciene vivire ‘cchiui. “‘Ndane tiratu lu coiuru cu tutti li pili!”, ticia nonnama.

Topu ca le fujazze erene state spianate vaniene ‘mpuggiate a ‘ttundu su na furmeddha fatta te taula, ca tania nu carottu a ‘mmienzu. La Tetta, ca puru iddha ave fatiatu tant’anni alla Picciurella, me tice : “La frabbaca era comu nu crande cambarone, a ‘mmienzu ‘nc’era nu taulacciu longu e rettangulare, tuttu ‘ngiru se ‘ssattavene le femmene; iou era la capi-squatra e me stava allerta cu ‘ndè caminu te na vanda all’addha lu panaru te lu tabbaccu. A na certa ora, quandu se faciene le nove, faciene marenda, poi a menzatia ‘ndè mangiavene lu pane; me racordu ca iou trasii cu fatiu a undici anni e tandu me tavene trenta sordi”. Susu alla furmeddha tunda te taula addhru ‘nc’era sistematu lu tabbaccu, vania ‘mpuggiata n’addha forma lu stessa, ca fatiava comu na pressa a motu ca le fujazze carcate te cusine pijavene menu largu. Sulu topu stu passaggiu lu tabbaccu ‘rrivava alle caruse ca stavene alla cernita.

La Carmela m’ave spiecatu ca puru iddha era carusa quandu ave ‘nzignatu cu fatia lu tabbaccu. M’ave tittu: “Topu ca era statu spianatu, vania purtatu alle cernitrici. Cinca facìa la cernitrice era stare ‘ncorta, parcete a stu repartu se scucchiavene le fujazze e se sistemavene pè culore e pè qualità.

‘Nc’erene quattru tipi te fujazze:

– le fujazze sane te culore biondu;

– le fujazze sane te culore scuru;

– le fujazze sane te culore marrò;

– quiddre strazzate te tanti culuri.

Comunque le fuiazze crandi vaniene chiamate “zaquiina” e quiddhre piccicche “picale”.

A stu puntu vania lu momentu te l’imballatura, ca vania fatta su nu talaru cupertu cu na pezza. Quassusu la femmana mintia facci vinti chili te fujazze, ca quandu ‘ssiene te ‘ddh’intra erene a forma te balla, poi vaniene cusute cu la cuceddra e cu lu spacu. Te quai passavene alla cambara te la stufa ca ardia a ottanta crati pè sette ottu giurni, prima cu lu portene allu tepositu.

L’enteriforme te Corzu Italia era nu crande capannone, ca ave spicciatu te fatiare facci na vintina te anni ‘rretu, quandu foe ‘nfittatu pè ‘lle machine te le rumate te la Saspi. Nù pare ma ‘ddha frabbaca, paru cu l’addhe, è stata pè tant’anni comu la manna te lu celu pè tante anime tesparate; nù ‘ssulu ‘nd’ave tatu pane, ma cinca fatiava allu tabbaccu s’ave misu puru le marche pè la penzione, quiddhe ca li vagniuni te moi nù rescene se mintene parcete ciujeddhi ole te li ‘ssicura. Moi a postu te la frabbaca te lu tabbaccu ‘nc’ete nu crande cantieri, cu na ruspa sempre a muvimentu; ticene ca olene ‘ffazzene nu crande condominiu cu facci trecentu appartamenti.

E cusine, cristiani mei, se ‘ndè sciu l’urtima frabbaca te Caddhipuli. ‘Cc’imu te tire? Ca la storia sutata te tante te ‘ddhe cristiane ca buttara lu sangu cu portene ‘nnanzi na famija a Caddhipuli nù barze ‘cchiui a nienti?

Na prece… li caddhipulini posara!

Lu tabbaccu, la frabbaca, la fatia, lu padrunu, la mescia ‘nzomma tuttu ddhu mundu ca moi nù ‘ncè ‘cchiui e ca se pijau tant’anni te vita e sutore te tante tabbaccuse, alla fine facciccosa arretu l’ave puru tata. Quiddha ca moi chiamene “emancipazione sociale, sicurezza ecunomica e mijore qualità te la vita te la femmana”, passau te li mani e te la fronte te tutte ‘ddhe povere cristiane. Erene iddhe ca cu la maistria ca sulamente le femmene tenene, fatiavene le fujazze te tabbaccu: sperte, precise e scartre; ma quistu trorà nù bastava parcè sotta sotta ci cumanda è sempre la sporca muneta, e quiddha facia pandire l’acu te la vanda loru soprattuttu parcè la manutopara femminile custava te menu!

Cinca cutia erene lu Cuncessiunari, ca erene l’unici autorrizzati cu chiantene lu tabbaccu. Lu vindiene quantu lu monopoliu stessu ‘ndè ticia ca custava, ma taniene la sicurezza te cinca se lu ‘ccattava, ca poi era lu monopoliu stessu, e taniene puru li sordi anticipati; lu monopoliu se ‘mpegnava puru cu paca lu ‘ntaresse passivu ci ‘ncasumai ritiravene lu tabbaccu fatiatu cu ritardu. Allu 1947 a tutte le campagne te la pruvincia te Lecce vaniene chintati a tabbaccu saccherà 18.000 ettiri te terra, ca poi vania fatiatu intra a 400 frabbeche e te ‘cchiui te 50.000 tabbaccuse. Allu sacondu topucuerra ‘nci foe la lotta pè l’occupazione te le terre ‘bbandunate, nu crande muvimentu te rinnovamentu te la società e pè l’ecunumia te sti paisi. La pruvincia te Lecce, paru cu li cuntatini, vitte l’esercitu te le mujeri, te le mamme, te le soru e de le fije tutte ca fatievene intra alle frabbeche te tabbaccu.

 

Crazie te core

Ci pe na fava e ci pe na ulia

pe tutti sona menzatia

e ciujeddhi mustica la pezza.

Tisse nu patucchiu ‘mpannatu ca lu stommucu tania ‘bbinchiatu.

E no!

Nun’è cusine ca su sciute le cose cummare mia.

E’ ‘bberu ca lu ‘bbinchiatu nu crite lu ‘ddasciunu!

Ma tante femmene

caruse ‘zzite, spusate , orfene e vetuve

ane cavarcatu lu ponte cu lu friddu te lu punente

Ane chiantu su ‘ddhi scanni ‘ppè li fij e ‘ppè li malanni

Lu culu ‘ndè brusciava

la spaddra ‘ndè tulia

e c’erene prene lu tabbaccu ‘ndè fatia

Cu lu jentu e cu lu friddu

cu lu sole e l’oricane

‘nd’ane purtatu a tutti pane

E si!

Ci nù era statu ‘ppè iddhe taveru la pezza erene musticatu

Perciò caddripulini mei a cinca nu ncè ‘cchiui ‘ddumamu nu luminu

ma tamunde nu vasu a quiddhe ca stane ‘ncora quai

parcete li ringraziamenti nu bastene mai!

Arte della Terra

arte_della_terraQuando la gente muria te la fame, parcè la miseria a Caddhipuli era tanta, se ‘ndè scia alle campagne ciarcandu farciccosa te mintire intra alla ventre… e gira te ‘cquai e gira te ‘ddhai, cinca sapi cu ota bonu ‘cchiava sempre te purtare a casa. Ma tanti te ‘ddhi frutti te la terra ca sarviene alli poviri pè campare moi su ‘ddhevantati piatti “speciali” intra alli meju risturanti. Pija le ciacureddhe: erene e suntu nu piattu pouru, ma riccu te sapore… e de racordi.


{tab=Frutti te Campagna}

Cozze e moniceddhi

Quandu ‘rrivava giugnu li povarieddhi se putiene parmattire puru cu ‘ssapurene la carne… ‘ppè motu te tire. ‘Ppè iddhi la carne erene le cozze piccinne farvute e ‘ccunzate cu l’oju, l’aju e lu rienu, ca te faciene fare mangia mangia… Ma ‘ncora meju erene li moniceddhi cu la panna, ma cu li pozzenne ‘cchiare ‘ddhi poviri cristiani passavene sciurnate sane cu scavene sotta ‘lle petre, ma ‘ndè valia veramente la pena te ‘ddha fatìa parcè ‘rrustute e fritte erene taveru nu piattu mutu bonu. E moi? Ci vai cu li ‘ccatti tocca firmi toi tre cambiali.

Fungi

Cinca canuscia li boschi e le macche, sapia addhu era scire cu inche ‘mprima ‘mprima nu panaru te fungi. Le munitule, li marieddhi, li sanguigni e… tante manere cu li cucini. Alla pizzaiola, cu li chiappiri, li cummitori spazzati e lu lauru, ‘rrustuti su la rascia, allu furnu cu lu pane crattatu… ‘Nzomma cu li fungi li povarieddhi se scialavene te taveru… e osci, comu ieru, a tutti ‘ndè piacene e ogni tantu farcincunu spiccia puru allu spitale parcè tocca sacci cu li coj, sanò te ‘mbileni!

Le fave

Quandu le chiante te le fave ‘mpizzutavene intra alli fondi, ‘nc’era farci povarieddhu ca scusu te lu patrunu scia cu se pija le puntaje te ste chiante. Tante ote però lu patrunu se ‘ddunava ma facia finta ca nu lu vitia, parcè sapia ca la fame era tanta e ca intra la casa te ‘ddhu spenturatu farci fiju staci chiangia. Le puntaje, tennare tennare, cu nu picca te oju e citu e farci fujazza te menta, te faciene passare la fame… pè nu picca.

Le foje

‘Cci ‘bbè crititi ca le foje suntu tutte li stesse? Li povarieddhi le canusciene bone e sapiene puru li misi e li fondi addhu crisciene le ciacureddhe, le mariule, le ‘nduranti, la foja crassa, li zanguni, le paparine. Stufate e cu le ulie niure erene taveru nu piattu povarieddhu ma a ‘ddhi tiempi nù ‘nc’era cu faci mutu lu stignusu, sanò la sera te curcavi cu la ventre alla spagnola.

Li craggioppi

Topu le vindegne, intra alle vigne se vitiene, comu tanti fantasimi, cristiani ca sciene raccujendu craggioppi, scusu scusu cu nù essene visti te lu patrunu, parcè puru quiddhi vaniene coddhi e stumpati. Ma ‘ppè li povarieddhi li craggioppi nù sarviene pè fare lu vinu, parcè quandu li purtavene a casa, li fiji pè la fame se mangiavene puru le raspe. E moi ci se li mangia li craggioppi? Ulimu la frutta bona, ulimu l’ua te taula. ‘Ncì ulia te taveru na taula… ma an’capu.

Li pampasciuni

Intra a casa te certi cristiani, nù mancava mai lu ‘zzoccu… parce sarvia ‘ppe’ fatiare e… cu faci li pampasciuni. Quandu se acchia lu puntu bonu ‘nc’era muta fatia te fare cu li coji, parcè criscene mutu a fundu intra alla terra… ma ‘ndè valia puru mutu la pena. Farvuti cu lu citu e poi ‘ccunzati cu na croce te oju te ‘nchiene taveru la ventre. Moi ci uliti cu li pruvati ‘ccattatubbe na motupala te cusì ‘bbè sparagnati la fatia cu li faciti sanò… ‘ccattatubbili sott’oju intra alli buccacci.

Li scrasciali

Utandu a ‘rripa alli scrasciali, quandu le campagne erene brusciate te lu sole te lu state, le sparascine erene na crazzia te lu celu, parcè nù ‘nc’erene mute cose ca putivi ‘cchiare. Cu nu beddhu mazzu se putia fare la frittata e ‘bbujute, ‘ccunzate cu lu limone e l’oju, ‘ddevantavene n’addhu piattu ca li povarieddhi nù se faciene scappare. Moi, ci sai cu le faci, suntu ‘ncora bone, speciarmente ci le minti a paracona cu certe purcarie muterne ca vindene.

Li sparìsci

‘Cci baddhizzi quandu se vitiene spuntiddhare li sparìsci a ripa alli scrascioli (ca suntu le chiante servatiche cu le spine), era lu ‘nzignale ca la primavera era già ‘rrivata e ca farci cosa bona te ‘cchiui se putia ‘cchiare alle campagne. Li sparìsci erene mutu ‘mpurtanti pè li povarieddhi, parcè cu quiddhi se putia fare na beddha e ricca (te sapuri…) frittata ca mangiava tutta la famija. E ci nù ‘nc’erene l’ove cu se pozza fare, se pijavene quiddhe te mita te intra li niti. Moi li sparisci li facene puru cu lu risu, cu la pasta e pè ‘ntipastu.

Rucula e Brucacchia

Moi a ‘ntaula sciamu ciarcandu puru la ‘nsalata ‘ppè cundimentu parcè simu tutti vizziusi. Ma, tanti anni ‘rretu, na coppa te “rucula e brucacchia” era l’unica cosa ca le famije povere certe sere putiene mintire intra alla ventre. Se pijavene le fujazze ‘cchiù tennarieddhe te la brucacchia, se ‘mbiscavene cu la rucula e, cu nu picca te vinu spuntu e de oju, se ‘ccunzava e se putia puru ‘ssuppare lu pane… cinca lu tania.

Ulie

Na coppa te ulie mature nù era mai nu ‘rranciamentu ma na cosa ca spattavi te tantu tiempu, parcè nù bitivi l’ora e lu mumentu cu te le mangi. Se ‘ccunzavene cu lu sale, cu le fujazze te fanucchiu e fujazze te murteddha e… sulamente lu ‘ndore te ‘nchia la casa. Ci poi tanivi nu stozzu te pane e de casu cu le ‘ccumpagni, era nu scialare. Puru moi tutti nui le sciamu ‘cchiandu ma nù ete tantu facile cu le trovi… e poi li cuntatini, alla facce oscia, quandu le facene se le tenene ‘ppè iddhi!

Zezzi

Nù era certu na novità ca tante fiate, mentru se fatiava a fore, li sciurnatieri ‘cchiù poviri nù taniene mancu nù stozzu te pane. E te cusine all’ora te la marenda se manavene an’facce alli scrasciali e se ‘nchiene la ventre cu li zezzi mori te le scrasce. Nù erene la fine te lu mundu, però armenu mintiene ‘ncorpu farciccosa cu tegnene la ventre nu picchi cumbra. Moi ci vai a ‘rripa alla ferruvia, viti li zezzi ca pendene a crappe e ca nù li tocca ‘cchiui ciujeddhi parcè… ciujeddhi ‘cchiui tene fame!


{tab=Contadini Mese per Mese}

Sciannaru – “Zappa e puta te sciannaru, ci oi ua intra ‘llu panaru”

A campagna ogni fatia vae fatta allu tiempu sou e nù se pote rimandare, parcé le chiante suntu comu li malati comu quandu ane basognu te lu metucu. Quistu ete lu mese giustu pe’ zappare e putare la vigna; cinca nù la face rischia cu nù face nu bonu raccoltu.

Fabbraru – “Fabbraru curtu e maru”

Li cuntatini sapene quante lacreme mare ane chiantu pè corpa te stu mese, ogni fiata ca nd’ave brusciatu l’ortu, cu li friddi e le scialate sue. E quandu li pisieddhi erene pronti pè cujire, la notte facia na scialata cusì forte ca li brusciava tutti e lu cuntatinu pè la tesparazione mullava tuttu e se ‘nde scia.

Marzu – “Lu mese ‘nnanzi ‘brile, cu nù pozza mai vanire”

Quandu te criti ca lu ‘mbiernu ete passatu: ppaaff! Nu corpu te jentu friddu e tocca cu te minti te capu lu cappottu. E propriu cu ‘ddhu jentu friddu ca marzu ave ‘rruvanatu tante fiate tutti li cuntatini spazzandu le vigne ‘ncora giovani e li frutteti già fiuriti.

Brile – “L’acqua te ‘brile, scascia le macazine”

Quandu chiove a lu mese te ‘brile li cuntatini se presciene, parcè sapene ca lu raccoltu ‘ddhaventa tantu ‘bbundante ca se inchene tutti li macazini e cusì se pote ‘ffruntare meju la stagione fridda. L’arburi e le chiante, cu l’acqua, facene li frutti cchiù crossi e sapuriti.

Masciu – “Masciu ‘ssuttu, pane pè tuttu”

Le fracule, li cucumbiri, le patite, la cucuzza e tanti addhi beddhi frutti, maturene a stu mese. Però, cu se pozza fatiare a ‘ngrazie te Diu, senza cu se fazza tannu alle chiante e alla terra, ave te fare tiempi boni, sanò intra alle campagne nù se pote mancu trasire.

Giugnu – “Lu mese te lu miessi, te li panni te nd’essi”

Tanti anni ‘rretu, a giugnu, li cuntatini sciene alla Basilicata pè lu miessi (va vene a tire la metitura) e turnavene a fine luju cu le posce chine te sordi. Te cusì, topu tanta fatia, ‘mpena ‘rrivavene a casa, faciene festa cu tutta la famija e pacavene tutti li tebbiti ca erene fattu la varnata.

Luju – “Luju, cautu ca te squaja, canta lu crillu, canta la quaja, ogni erva ‘ddhaventa paja”

Puru ca lu sole ‘bbinchia a ‘ncapu e face sutare sette camise, li cuntatini fatiene sempre. A stu mese raccojene l’erva siccata e la paja, ca poi lu maru ‘mbiernu ddhaventa pane pè tutti l’annimali te intra la staddha. L’unica cumpagnia, intra lu silenziu te li campi, ete lu cantu te l’auceddhi e te li crilli.

Ustu – “Vinne ustu e nù te vastisti, fiaccu cunsiju bbisti”

La matina ‘mprima, li cuntatini vane cu fatiene intra alli campi e tornene la sera tardu. A stù mese ‘nzignene già cu se portene la giacchetta, ca te nu mumentu all’addhu se potene utare li maletiempi te fine state. ‘Nzomma, cinca ete prutente, nù ‘ccappa mai te fessa.

Settembre – “Settembre, ua e fica pende”

‘Nzigna a ‘ndhafriscare nu picca l’aria, le sciurnate su ‘ddevantate cchiù curte e li cuntatini se potene permattire cu se raposene farci picca. E quanti beddhi frutti maturene a stù mese. L’ua, le site, le fiche quaje, le fiche alba chiara, li cachi, le scisciule e… lu bonu appetitu!

Ottobre – “Te Santu Luca, ci nù semmana nù manduca”

Passatu lu periutu te Santu Luca, cinca nù ave semmanatu lu cranu, l’orgiu, oppuru le fave e li pisieddhi, minte a rischiu lu raccoltu, ca ci li friddi ‘rrivene ‘mprima, le chiante nù tenene la forza cu criscene bone e cu dane lu giustu quantitativu te fruttu.

Novembre – “Te Santu Martinieddhu, minti alla utte lu spinieddhu”

Era bellu, quandu l’undici te stù mese, comu ulia la tratizione, lu cuntatinu trasia cu li parienti e amici, intra la cantina e, comu nu ritu, topu tanta fatia, ‘bbrindavene cu lu vinu nou e faciene festa ticendu: Santu Martinu. Era n’aucuriu cusì lu vinu ‘ddevantava bonu e pè fare nu raccoltu ‘bbundante.

Dicembre – “Ci chiove te Santa Bibbiana, chiove nu mese e na samana”

‘Cci paura ca taniene ‘ddhu giurnu li poviri cuntatini. Timiene ca ci la matina te lu toi ticembre se ‘zzavane chiuvendu e allora chiuvia pè quaranta giurni e quaranta notti; e cusì nù se putia ‘cchiui fatiare intra le campagne ‘llacate pè la muta acqua.


{/tabs}